Top
Batukamma

AP BJP కీలక నిర్ణయం.. ఆ న్యూస్ ఛానల్ ను‌‌‌ బహిష్కరిస్తూ ప్రకటన..!

AP BJP కీలక నిర్ణయం.. ఆ న్యూస్ ఛానల్ ను‌‌‌ బహిష్కరిస్తూ ప్రకటన..!
X
Highlights

ఏపీ బీజేపీ సంచలన నిర్ణయం తీసుకుంది... తాజాగా జరిగిన పరిణామాలతో ప్రముఖ తెలుగు న్యూస్ ఛానల్ ఏబీఎన్‌ ఆంధ్రజ్యోతి ఛానల్ ను బహిష్కరిస్తున్నట్లు ప్రకటించింది.

ఏపీ బీజేపీ సంచలన నిర్ణయం తీసుకుంది... తాజాగా జరిగిన పరిణామాలతో ప్రముఖ తెలుగు న్యూస్ ఛానల్ ఏబీఎన్‌ ఆంధ్రజ్యోతి ఛానల్ ను బహిష్కరిస్తున్నట్లు ప్రకటించింది. ఈ మేరకు ఆ పార్టీ ఏపీ బీజేపీ మీడియా ఇంచార్జి వుల్లూరి గంగాధర్ పత్రిక ప్రకటనను విడుదల చేశారు.

" పత్రికా ప్రమాణాలు, టీవీ ఛానల్‌ నైతిక విలువలు గాలికొదిలేసి తెలుగుదేశం పార్టీ కరపత్రిక, ప్రసార సాధనంలా పనిచేస్తున్న ఏబీఎన్‌ ఆంధ్రజ్యోతిని భారతీయ జనతాపార్టీ ఆంధ్రప్రదేశ్‌ రాష్ట్రశాఖ ఇక నుంచి బహిష్కరిస్తున్నది. నిన్న భారతీయ జనతా పార్టీ రాష్ట్ర ప్రధాన కార్యదర్శి విష్ణువర్ధన్‌ రెడ్డి గారిని చర్చా కార్యక్రమానికి ఆహ్వానించి, చర్చ జరుగుతున్న సందర్భంలో టిడిపి ప్రయోజనాల కోసం దాడికి పాల్పడిన వ్యక్తి మీద కేసు నమోదు చేయించకుండా తిరిగి ఈ రోజు చర్చకు ఆహ్వానించి తెలుగుదేశం పార్టీ ప్రయోజనాలు కాపాడడం కోసం ప్రయత్నించడం సిగ్గుచేటు.

తెలుగుదేశం పార్టీ ప్రయోజనాలను కాపాడటమే లక్ష్యంగా మీడియా ముసుగులో పనిచేస్తున్న ఏబీఎన్‌ ఆంధ్రజ్యోతి టీవీ చానల్‌ ను మరియు ఆంధ్రజ్యోతి పత్రికను నేటి నుంచి భారతీయ జనతా పార్టీ పత్రికా విలేకరుల సమావేశాలకు ఆహ్వానించరాదని, ఆ టీవీ చానల్‌ చర్చా కార్యక్రమాలలో బీజేపీ ప్రతినిధులు పాల్గొనరాదని పార్టీ నిర్ణయించింది.

రాష్ట్ర బిజెపి యొక్క ఈ అధికారిక నిర్ణయాన్ని ఉల్లంఘిస్తూ, ఎబిఎన్‌ ఛానల్‌ తనకు నచ్చిన వారిని ఆహ్వానించి, వారిని పార్టీ వాయిస్‌గా ప్రచారం చేసి ప్రజల్ని మోసం చేయాలని చూస్తే, ఎబిఎన్‌ ఛానెల్‌పై చట్టపరమైన చర్యలతో పాటు ఇతర అనువైన చర్యలకై బిజెపి ఉపక్రమిస్తుంది. ఆంధ్రజ్యోతి యాజమాన్యం బేషరతుగా వీజేపీ ఆంధ్రప్రదేశ్‌ కు క్షమాపణ చెప్పేవరకు ఈ బహిష్కరణ కొనసాగుతుంది" అని ఆ ప్రకటనలో వెల్లడించింది.





Next Story
Share it